Օծվեց Առատաշենի Սուրբ Աստվածածին եկեղեցին

Jun 19, 2015 | Թողնել մեկնաբանություն

Էջմիածնի շրջանի, Քասախ գետի աջափնյակում գտնվող Առատաշեն համայնքը այս օրվան երկար էր սպասել: Դեռ 2012թ.-ից սկսված եկեղեցու շինարարության աշխատանքներն արդեն ավարտին են հասել:  Հունիսի 17-ին, Արմավիրի Թեմի Առաջնորդ գերաշնորհ Տեր Սիոն եպիսկոպոս Ադամյանի ձեռամբ օծվեցին նորակառույց Սուրբ Աստվածածին եկեղեցու գմբեթի խաչն ու զանգերը` որպես նախընթաց երկու օր հետո  կայանալիք եկեղեցու հիմնական օծման արարողության:

Իսկ այսօր՝ հունիսի 19-ին կայացավ եկեղեցու բացման և օծման արարողությունը, ձեռամբ Արմավիրի Թեմի Առաջնորդ գերաշնորհ Տեր Սիոն եպիսկոպոս Ադամյանի, մասնակցությամբ Հայոց Բանակի հոգևոր Առաջնորդ Տեր Վրթանես եպիսկոպոս Աբրահամյանի և Արմավիրի թեմի հոգևորական դասի: Հանդիսավոր օծման սուրբ արարողությանը ներկա էին Արմավիրի մարզպետ տիար Աշոտ Ղահրամանյանր, բարձրաստիճան պաշտոնյաներ, բազմաթիվ հյուրեր Հայաստանի այլ մարզերից և անգամ արտերկրից, բազմաթիվ հավատացյալներ Առատաշեն համայնքից` իրենց համայնքապետի գլխավորությամբ: Առաջնորդ Սրբազան հայրը կարդաց ազգիս Վեհափառ Հայրապետի սրբատառ կոնդակը, որով նորաօծ եկեղեցու բարերարը պարգևատրվեց «Սուրբ Ներսես Շնորհալի» շքանշանով:

Եկեղեցու բարերարն է համայնքի բնակիչ տիար Արամ Պողոսյանը, ով ՊՆ պահեստային գնդապետ է և Արցախյան ազատամարտի մասնակից:  Եկեղեցին բազիլիկ կառույց է, որի ճարտարապետն է Սամվել Հակոբյանը: Ճարտարապետի օգնականն է համայնքի բնակիչ Վարդան Պողոսյանը, իսկ քանդակագործ վարպետը Աշոտ Ներսիսյանն է, ովքեր բոլոր աշխատանքները կատարել են մեծ նվիրումով և սիրահոժար կերպով, այդ կերպ իրենց ներդրումն ունենալով եկեղեցու կառուցման գործին: Բարեկարգվել է նաև եկեղեցու հարակից տարածքը, որին իրենց մասնակցությունն են ունեցել հավատավոր զավակներ և′ համայնքում, և′ արտերկում ապրող, ինչպես նաև դպրոցի  տնօրինությունը և համայնքապետարանը՝ համայնքապետ Վահրամ Հարությունյանի գլխավորությամբ:

Եկեղեցին անվանակոչվել է Սուրբ Մարիամ Աստվածածնի անունով, ի հիշատակ  բարերարի մոր և բոլոր մայրերի:

Արարողության վերջում գերաշնորհ Սրբազան Հայրն իր շնորհավորական օրհնության խոսքն ասաց, որի մեջ հատկապես մաղթեց, որ բարձրացված արդեն Սուրբ Խաչը պահապան լինի Առատաշեն գյուղին: Իսկ երբ զանգերը ղողանջեն` հավատացյալների սրտերը լցվեն ուրախությամբ և հավատքի լույսով և իրենց քայլերն ուղղեն դեպի նորաօծ սուրբ եկեղեցի, որտեղ կբարձրացվի աղոթք առ Աստված մեր հայրենիքի և ժողովրդի բարօրության և հավատքի ամրապնդման համար:

Հավարտ օծման արարողության, արդեն նորաօծ եկեղեցում կայացավ բարերարի որդու և թոռների մկրտության արարողությունը:

Հանդիսավոր արարողությունից հետո բազմահազար ժողովրդի համար տրվեց սիրո ճաշ` մատաղ: Ամենքը գոհ էին և ուրախ, և փառք էին տալիս Ամենաբարձրյալ Արարաչին:

 

Leave a comment

Enter Analytics/Stat Tracking Code Here